Штурм (1930)/Вершы/Зьняволенай жанчыне Захаду

Зьняволенай жанчыне Захаду
Верш
Аўтар: Юрка Лявонны
1930 год

Іншыя публікацыі гэтага твора: Зьняволенай жанчыне Захаду.

Прапануем да спампаваньня!

ЗЬНЯВОЛЕНАЙ ЖАНЧЫНЕ ЗАХАДУ

Даволі гнуцца сьпінам!
Мы гневу кліч расьсеем, —
Работніцы Бэрліну,
Жанчыны Нью-Джэрсэя^[1].

Ці-ж не адзіным лёсам
З братамі і бацькамі
Жыцьця спаялі плёсы
І кінулі аб камень?

На сьпіцах трыкотажу,
У завадзкой лагчыне…
О, праца!
Колькі важыць
Адна сьляза жанчыны?!

За бытавою шыльдай
Гараць старыя раны…
Туманныя Шэфільды
І жоўты фон Ірана…^[2]

Капіталіста рукі
Гатовы правіць трызну.
І закіпае грукат
І хоча хваляй пырснуць.

Па цытадэлі цэлься,
Па злога ўціску залях, —
Капальніцы з Уэльсу,
Пастушкі з Трансвааля!^[3]

Яно ўзыйдзе,
збавеньне,
І цьвёрдым крокам стане —
У раззлаванай пене
Зьмятаючых паўстаньняў!

І роўная між роўных,
Работніца сусьвету
Закрочыць, бязумоўна,
Да ясназорых мэтаў!