Шляхам жыцьця (1923)/II/Хохлік

← Ў вечным боры…

Хохлік Верш Аўтар: Янка Купала 1923 год

Чорны Бог →

Іншыя публікацыі гэтага твора: Хохлік (Купала)

Прапануем да спампаваньня!

Хохлік.

Як зайграе ў лесе хохлік, —
Замірае песень воклік;
Як зачэпе мох і лозы, —
Аджываюць сьмех і сьлёзы…

Ў цёмным яры скачуць чары,
Кветка чахне на папары,
Лісьць трасецца на асіне,
Вогнік блукаецца сіні.

Барадой Лясун ківае,
Шалы нетрай спавівае;
Ваўкалак за дамавінай
Выпаўзае на пуціну.

Ад загона да загона
Хохлік царскаю каронай
Карануе у сусьветы
Сухалесы, пустацьветы.

Хохлік грае, ведзьма скача,
Ноч сьмяецца, сонца плача,
Толькі песень ня чуваці
На стаптанай сенажаці.

---