Шляхам жыцьця (1923)/II/З летніх малюнкаў

З летніх малюнкаў
Верш
Аўтар: Янка Купала
1923 год

Іншыя публікацыі гэтага твора: З летніх малюнкаў

Прапануем да спампаваньня!

З летніх малюнкаў.

Коціцца, ўецца далінкай крыніца,
Б’ецца, плюскоча ў каменьнях вадзіца,
Далей плыве і плюскоча.
Белымі грудкамі лёгшы на траўцы,
Хоча дзяўчынка к вадзіцы дастацца,
Губкамі чэрпнуці хоча;

Вольха лісткамі ёй шыю шчакоча,
Плюскатам рэчка сьмяецца у вочы,
Сонейка ўсіх абнімае.
Сонейка, рэчка, вольха, дзяўчына
Думцы ўсьмяхаюцца соладка, дзіўна,
Думка іх шчыра вітае…