Шляхам жыцьця (1923)/II/Воўк

Воўк
Верш
Аўтар: Янка Купала
1923 год

Іншыя публікацыі гэтага твора: Воўк (Купала)

Прапануем да спампаваньня!

Воўк.

Топчучы верас і мох
Цёмных імшараў і лоз,
Выбрыў на сонны разлог,
На аплясьнелы пакос.
Зубам ляскоча аб зуб,
Вочы пылаюць агнём;
Стаў, як калода, як слуп,
Стаў і азваўся выцьцём.
Выў сярод дрэмлючых ніў,
Якбы на суд каго зваў,
Хто сатварыў, спарадзіў,
Хто узрасьціў, гадаваў.
Ноч — ён на вырай, на жыр;
Дзень — у бярлогу, як смоўж…
Пустка удоўжкі і ўшыр,
Пустка ушыркі і ўдоўж…
Выў ён, а рэха ўсё ў даль
З рогатам дзікім плыло,
Толькі ня віўся ў ём жаль…
Рэха пракляцьце нясло.