Шляхам жыцьця (1923)/I/Ці-ж ня доля мая?!

← Беларус

Ці-ж ня доля мая?!. Верш Аўтар: Янка Купала 1923 год

Грай-жа, музыка! →

Іншыя публікацыі гэтага твора: Ці ж не доля мая?!

Прапануем да спампаваньня!

Ці-ж ня доля мая?!..

І на што-ж мне воля вольная,
Залатая, расхахольная? —
Цемняком пайду сьляпы я
На дарожкі крыжавыя!
Эх ты, доля мая,
Маю волю ўжо я!

І на што школа з настаўнікам,
Добра быць і неахайнікам:
Калі з кніжкі не даўчуся, —
У вастрозе далаўчуся.
Эх ты, доля мая,
Маю школу ўжо я!

І на што-ж мне поля гонейкі,
З дабром клеці, коні, волікі?
Я магу жыць і „пашырэ“
У шырокай у Сібіры.
Эх ты, доля мая,
Зямлю маю ўжо я!

І на што-ж мне хата новая,
Сталы, лавы ўсё дубовыя?
Злыдні змогуць маю сілу, —
Як пан, лягу у магілу.
Эх ты, доля мая,
Хату маю ўжо я!..

---