Шляхам жыцьця (1923)/I/Мой дом…

Мой дом…
Верш
Аўтар: Янка Купала
1923 год

Іншыя публікацыі гэтага твора: Мой дом (Купала)

Прапануем да спампаваньня!

Мой дом.

Мой дом — прывольле зьвёзднай далі,
Арламі мераны абшар,
Дзе бітвы точуць ветраў хвалі
З сям’ёй глухіх калматых хмар.

*

Мой дом — амшалай пушчы сховы,
Сяліба ясеняў, сасон,
Дзе сьмех русалчын, лясуновы
Палошыць вечна-цяглы сон.

*

Мой дом — пяшчаныя разлогі,
Пакута сьцюжы і сьпякот,
Дзе ў скібах лад вядуць нарогі,
Аздобай цьвет — чырвоны пот.

*

Мой дом — узьмежных зёлак восьці,
З сухой асінаю курган,
Дзе тлеюць прадзедавы косьці,
Дзе плача ночка ды туман.