Шляхам жыцьця (1913)/V/Падымайся, ўставай!

З пляцоўкі Вікікрыніцы
Ён і яна Падымайся, ўставай!..
Верш
Аўтар: Янка Купала
1913 год
Мой погляд і мэта
Іншыя публікацыі гэтага твора: Падымайся, ўставай!..

Спампаваць тэкст у фармаце EPUB Спампаваць тэкст у фармаце RTF Спампаваць тэкст у фармаце PDF Прапануем да спампаваньня!




Падымайся, ўставай!..

Падымайся, ўставай!
Апранай капоту:
Ад двара, ат купца
Клічуць на работу.
Падымайся, ўставай!
Шмат ё латаць дзюрак:
Зарос кустам дзірван,
Трэба сотню шурак.
Падымайся, ўставай!
Умыйся сьлязою:
Кабыліну ваўкі
Коньчуць за гарою.
Падымайся, ўставай!
Думкі патрывожы:
Хмара йшла, разнесла
Твае гоні-збожэ.
Падымайся, ўставай!
Звела немач сына:
Трэба ймшу закупіць,
Трэба дамавіна.
Падымайся, ўставай!
Не бурчы с прасонку:
Дружкі йшлі і зайшлі,
Просюць у карчомку.
Падымайся, ўставай!
Прапіў, выпіў годзе!
Цэлы сьвет у вачах
Калаўротам ходзе.
Падымайся, ўставай!..
І на што-ж ты здаўся?
Пацягнулі ў вастрог;
Ну, вось і даспаўся!