Чарадзей вялікі

З пляцоўкі Вікікрыніцы
Чарадзей вялікі
Верш
Аўтар: Язэп Пушча
1961
Крыніца: https://knihi.com/Jazep_Pusca/Viersy.html#chapter235

Спампаваць тэкст у фармаце EPUB Спампаваць тэкст у фармаце RTF Спампаваць тэкст у фармаце PDF Прапануем да спампаваньня!




На высокай кручы, над Дняпром-ракою,

Слухаюць народы песню грамадою,

Слухаюць Тараса, сына Украіны.

Не зламалі буры крыл тваіх арліных,

Над Радзімай сокал узляцеў высока

І акінуў вокам даль зямлі навокал.


Не ляжыць праклёнам на грудзях больш камень,

«Запавет» спяваюць і Дняпро, і Канеў,

І браты, і сёстры, вербы і каліны,

І сыны, і ўнукі маці Украіны.

Далучыўся голас роднага Купалы:

Досвіткам усталі, сонца не праспалі.


О Кабзар-музыка, чарадзей вялікі,

Да шчаслівай долі свой народ ты клікаў:

«Ланцугі няволі скінь, разбі, народзе,

Родныя хай нівы табе шчодра родзяць».

Над Дняпром шырокім, на высокай кручы,

Слухаюць народы голас неўміручы.


26 лютага 1961 г., Мінск