Хрыстаматыя беларускае літэратуры. ХІ век—1905 год/А. Рымша, Л. Мамоніч/А. Рымша/Краналёгія

← А. Рымша

Краналёгія Верш Аўтар: Андрэй Рымша 1922 год

На гэрб Остафея Воловіча →

Іншыя публікацыі гэтага твора: Храналогія (Рымша).

Прапануем да спампаваньня!

КОТОРОГОСЯ МС̅Ц̅А ШТО ЗА СТАРЫХ’ ВЕКОВ’ ДЕЕЛО
КОРОТКОЕ ОПІСАНІЕ.

(5 мая 1581 г.).

Мс̅ц̅а сентебра погебреіску еюль
просто вресень.
Двад’цать четвертого дня мс̅ц̅а сен’тебра
дороблен’ еросолім’ сталася реч’ добра.

Мс̅ц̅а октовріа погебреіску тышрі
просто паздернік’.
Арха з ноім’ на горе станула на суші,
другіі потоп’ не будет так’ нам’ пісмо туші…

Мс̅ц̅а ноемвріа погебреіску марге усам’,
просто грудень.
Жідом’ свято уставіл’ тут царь еровоам’,
мы о своі недбаем’, невелміж’ добро нам’…

Мс̅ц̅а декавріа погебреіску хашлеу
просто просінец’.
В том’ мес̅ц̅ы іс̅ х̅с̅ народілся нам’,
нехто іныі тот ізбавіл’ душі сам’…

Мс̅ц̅а генуара, погебреіску тебет,
просто стычень.
Чужозем’скіе мудр’цы х̅а̅ прівіталі,
злато ладан’ і міру яко пану далі…

Мс̅ц̅а февраля погебреіску себат.
просто лютыі.
Смотрі як’ то голубка ноаху служіла,
мы о бога недбаем’ толькоб’ злость плужіла…

Мс̅ц̅а марта, погебреіску адар’,
просто марец’.
В’ том’ месецы господа жіды кріжовалі.
собе ліхо нам’ добро тым’ паном’ з’едналі…

Мс̅ц̅а апріля, погебреіску нісан,
просто кветень.
Жідове сухо прошлі чірвоное море
корміл’ іх’ бог напушчі не было ім’ горе…

Мс̅ц̅а мая, погебреіску іяр’.
просто маі.
Ноі арху готует’ божім’ повеленіем’,
абы в’ потоп’ незгінул’ з’ своім поколеньем’…

Мс̅ц̅а іюня, погебреіску сыван’
просто чырвец’.
Ужо воды в’сіх топят ноах в’ корабль вошол’.
Знать іж’ богу кланялся, про то ласку знашол’…

Мс̅ц̅а іюля, погебреіску тамус,
просто ліпец’,
Моісіі побіл’ табліцы з’ пріказаньем божім’
а мы грешім што часок’, ніся страхом трвожім…

Мс̅ц̅а августа, погебреіску аов’ лібо ав’,
просто серпень.
В’ том’ месецы аарон’ умер’ божіі ереі,
того собе напріклад’ ты попе зав’жды меі…

Мс̅ц̅а — месяца.
туші — дае надзею.
і̅с̅ х̅с̅ — Ісус Хрыстос.
плужіла — здавальняла.
ніся — ні сябе.
зав’жды — заўседы.