Творы. 1918―1928 (1930)/5/Для насьценнай газэты Б. Дз. В.

Для насьценнай газэты Б. Дз. В.
Верш
Аўтар: Янка Купала
1930 год

Іншыя публікацыі гэтага твора: Для насценнай газеты БДзВ.

Прапануем да спампаваньня!

ДЛЯ НАСЬЦЕННАЙ ГАЗЭТЫ Б. Дз. В.

1

ШТО ТЫ СЬПІШ?

Па Кальцову

Што ты сьпіш, Госіздат?
Бач, вясна на дварэ,
І суседзі твае
Ўжо працуюць даўно.

Ты збудзіся, устань,
На сябе паглядзі,
Чым ты быў, чым ты ёсьць,
І што будзе з цябе.

Ні шрыфтоў, ні прылад,
Ні тэй фарбы людзкой,
І паперу тваю
Даядае пацук.

Замест кніжак для школ
Блянкі шлёпаеш ты,
А пацехі ад іх
Ні табе, ні людзям.

Ты устань, Госіздат,
Пратры вочы свае,
Бо інакш хтось другі
Скарыстае твой сон.

2

ДА НАШАГА ПРАЎЛЕНЬНЯ БЕЗНАДЗЕЙНАЕ МАЛЕНЬНЕ

Праз нашу бясцэнную
Газэту насьценную
Заносім маленьне, —
Зьвяртаемся з просьбаю
(Ды ўжо-ж — ня з грозьбаю)
К табе, праўленьне!

Вока ласкавае
Мей ты над справаю
Друку ўляпшэньня:
Для нашых сэктараў
Трэба, як нэктару,
Грошы, праўленьне!

Паперы белае
Кіп сотні цэлыя
Даць мей хаценьне,
І шрыфту ўсякага,
Але нябыякага,
Падай, праўленьне!

Машыну сшывальную
І фальцавальную
Для палягчэньня,
Машыну наборную
І фарбу чорную
Дай нам, праўленьне

І цынкографію,
Для поліграфіі
Нашай збаўленьне,
І стэратыпную
Болей дасьціпную
Падай, праўленьне!

Пад пераплётную
Больш паваротнае
Дай памяшчэньне;
Ад сьціску цеснага,
Як зла няўцешнага,
Выбаў, праўленьне!

Хоць неактыўнае,
Але колектыўнае
Гэта маленьне
Заносім плачучы,
Прасьвету ня бачучы,
К табе, праўленьне!

1924 г.