Творы. 1918―1928 (1930)/5/Дзе ты, хмелю, зімаваў?..

← Гэй, паехаў сын Даніла…

Дзе ты, хмелю, зімаваў?.. Верш Аўтар: Янка Купала 1930 год

Габруся ў жаўнерку ўзялі… →

Іншыя публікацыі гэтага твора: Дзе ты, хмелю, зімаваў?...

Прапануем да спампаваньня!

4

ДЗЕ ТЫ, ХМЕЛЮ, ЗІМАВАЎ?..

Дзе ты, хмелю, зімаваў,
Што не разьвіваўся?
Дзе ты, сынку, начаваў,
Што не разуваўся?

Зімаваў я ў старане,
Дзе віхуры дзьмулі;
Начаваў я на вайне,
Дзе гуляюць кулі.

*

Дзе ты, хмелю, улетку цьвёў
Што засох бяз сьледу?
Дзе ты, сынку, дзень правёў,
Што і не абедаў?

Цьвёў я ўлетку, дзе пякуць
Сьпекі агняваты;
Дзень правёў я, дзе гудуць,
Як грымот, гарматы.

*

Чаму, хмелю, не адну
Зносіў сьцюжу, сьпеку?
Чаму сынку, на вайну
Шоў ты ў небясьпеку?

Доля кінула мяне
Гінуць так, як гіну;
Ваяваў я на вайне
За сваю краіну.

1919 г.