Творы. 1918―1928 (1930)/2/Два светы

← Ад менскіх дзяцей на прывітаньне IV Усебаларускага зьезду саветаў

Два светы Верш Аўтар: Янка Купала 1930 год

Дзе стаяў двор панскі… →

Іншыя публікацыі гэтага твора: Два сьветы (Купала).

Прапануем да спампаваньня!

ДВА СЬВЕТЫ

1
ДЗЕД

Сёрбай, дзеду, сёрбай
Крупнік ды зацірку, —
Пабрыдзеш бо з торбай,
З торбай дзірка і ў дзірку.

Закарбуй на бірку,
Што на гора спор быў,
Спорна год нацыркаў,
Дарабіўся горбу.

Высьвідраваў корбай,
Вырыў плугам-кіркай
Баразьністу ворбу
Тры аршыны шыркай.

Выцерпеў прыдзіркаў,
Што і мор ня сьцёр-бы, —
Стар і мал век гыркаў:
— Сёрбай, дзеду, сёрбай

2
УНУК

Дзедаў ўнук-гарэза, —
Як шмель чапурыцца,
Ўсе-б платы парэзаў,
Плот яму — макрыцца.

Ён не спакарыцца,
Як сам рымскі цэзар, —
Хто супроць — кастрыцай,
Бахне і з „абрэза“.

У руках жалеза
Жарам заіскрыцца,
Не ўпляце дзярмезаў
Яму і цямрыца.

Як ёсьць чым прыкрыцца —
Багацей ад Крэза…
Выйдзе ў свет крыніцай
Дзедаў ўнук-гарэза.

1926 г.