Творы. 1918―1928 (1930)/1/Беларускія сыны

← Свайму народу

Беларускія сыны Верш Аўтар: Янка Купала 1930 год

На нашым… →

Іншыя публікацыі гэтага твора: Беларускія сыны.

Прапануем да спампаваньня!

БЕЛАРУСКІЯ СЫНЫ

Па беларускім бітым шляху,
Б‘ючы ў кайданавы званы,
Брыдзе чужынец, а з ім побач
Хто?
— Беларускія сыны!

У беларускім вольным краю,
З ярэмнай збрыўшы стараны,
Царыць чужынец, а ў паслугах
Хто?
— Беларускія сыны!

Над беларускай беднай хатай,
Як полка вырвана з труны,
Вісіць чужы сьцяг, а трымае
Хто?
— Беларускія сыны!

У Беларусі сьпеў чужацкі,
Як над касьцямі груганы,
Крумцяць чужынцы, а іх складам
Хто?
— Беларускія сыны! —

На беларускім буйным полі
З вясны да новае вясны
Растуць крыжы, а пад крыжамі
Хто?
— Беларускія сыны!

1919 г.