Сшытак вершаў (Александровіч, 1938—1946)/Сябры…

Сябры…
Верш
Аўтар: Андрэй Александровіч
1946 год

Прапануем да спампаваньня!

Сябры…

Сябры збяруцца, ўспамінаюць
Жыццё на волі, родны край.
Праявы ў думках набягаюць,
Цыгаркі гаснуць няўзначай.

То як прыбой бурлівай хвалі
Ўзлятае гутарка парой,
То цішыня ў вачах распаліць
Глухі агонь тугі нямой.

Гудзіць марозамі пустыня,
Туманам свет завалакло.
Успомніш ты, чаго ў паміне
Здаецца нават не было.

Хтось вобраз мілай прыгадае,
Вясёлы ўзлёт былой вясны,
Па свойму ціха заспявае
На мове сонца, скал, зурны.

На лад ад бацькі пераняты
Хтось песняй пестуе ў душы —
Садок вішнёвы каля хаты,
Сей зноў праслаўленную шыр.

Як жыць на бацькаўшчыне люба!
Аднак за свой кароткі век
Жыццё тады сваё галубяць
Калі ў пакуце чалавек…