Старонка:Zbor t1v1 1928.pdf/146

ЖНІЎНЫЯ ПЕСЬНІ

Жарыць сонца бяз літосьці,
Варам пыша ад палёў,
Трэцца жыта ў пыла на просьце,
Зерне сыплецца далоў.

Хоць-бы хмарка дзе на небе,
Хоць-бы рэдзенькі цянёк…
І бяз часу ў цьвёрдай глебе
Сьпее грэчка і лянок.

Душна ў полі і маркотна.
Постаць жоўтая хлябоў
Ціхім шолахам гаротна
Просіць жнек і сярпоў.

Вось прышлі і жнейкі ў поле.
Заскакаў крывы сярпок,
І панёсься на прывольлі
Жнейчын звонкі галасок.

Сакавіты і пявучы,
Як вясенька малада,
А тон жаласны, цягучы,
Поўны жальбы і нуды.