Старонка:Zbor t1v1 1928.pdf/128

З пляцоўкі Вікікрыніцы
Гэта старонка была вычытаная

ДЗЕ ДЗЕНЕШСЯ?

Не такі чорт страшны,
Як яго малююць.
Хай усе хоць людзі
На цябе сярдуюць:

Ад сабак паганых
Ёсьць кій бараніцца,
„Ад шнуроў чырвоных“
Можна адкупіцца.

Ад мундзіраў сініх
Можна даць і драла,
І твая свабода
Ня зусім прапала.

І з людзьмі ліхімі
Можна меркавацца,
І ад крэдытораў
Спосаб ёсьць схавацца.

Покі служаць ногі,
Можна бегчы ўсюды,
Ад сябе-ж самога
Не ўцячэш нікуды.

1910 г.