Старонка:Uładzimier Chadyka - Suniсy (1926).pdf/20

ЖНІВЕНЬ

Расплыўся ўсьмешкаю жнівень,
Зашастаў саломай з-за плоту,
Забегаў полем жартліва
Ў капоце золата-жоўтай…

У поясе бура-грачнёвым,
З каўнерам снапом ператканым,
Зьядае вокам агнёвым
Ён з даляў восені плямы…

Праз ціхі блакіт сее шчасьце,
Зьвіняць ува ўсю жыцьця струны,—
Шчасьлівы ён, узбагаціў
Дабром сялянскія клуні…

Яны ад буйнога прыбытку
Ахвотней працуюць радыя—
Ніхто не зьдзярэ сьвіткі,
Падкраўшысь, як воўк, ззаду…

Замёр уздых пакутны,
Калыша далі песень
Ланцуг бадзёры, магутны—
На волі ўсяму весела!