Навум.
Добра прыгаворка кажа:
Вяліць пан, то скачы, ўража!
Хор.
Гэй, хто жывы і г. д.
Спяваюць чатыры радкі, танцуючы.
Дабровіч (заканчваючы паланез).
Калі споўнілі тым часам
Звычай даўны ў першым тане,
Ты, Югася, сам-насам
Павядзі для нас гулянне.
Юлія танцуе балет.
Ян (да Кароля).
Ах! як яна прыгожа ў тане!
Кароль (са злосцю).
А табе маўчаць, балване!
Ян.
Ах! тут кожны ашалее!
Кароль.
Сцеражыся! бо загрэю!
Хор дворных.
Ах, як лёгка! Як на фалі.
То вось бліжэй, то вось далей;
З ветрам мкнецца ўперагонкі,
Стан павабны, гібкі, тонкі!
Хор сялян.
Прыгожа, як анялочак,
А лёгка, як матылёчак;
Ножкамі перабірае,
Аж у вачах нам мігае.
Дабровіч.
Вельмі дзякуй! Брава! Брава!
А цяпер ўсе - толькі жвава!
Хай працягнецца забава,
Жыва ў пары... Ўлева! Ўправа!
