66. ПАЦЯГ ТУМАН ПА ДАЛІНЕ
Пацяг туман па даліне[1],
Шырок лісцік на каліне,
Яшчэ шыршы на дубочку,
Кліча голуб галубачку,
Хоць не сваю, чужую:
— Хадзі, сэрца, пацалую.
— Нашто чужу цалаваці,
Сваёй жалю задаваці.
Не задавай сэрцу тугі,
Не возьмеш ты, вазьме другі,
Не другі, возьме трэці,
А не трэці, то чацвёрты,
Не чацвёрты, возьме пяты,
Не ты, шэльма, распракляты.
67. ПАЙШЛА, ПАЙШЛА КРАСНАЯ ДЗЕЎКА
Пайшла, пайшла красная дзеўка,
Да гэй, у лясочак
Да прабіла правую ножку,
Да гэй, на трасочку.
Баліць, баліць правая ножка,
Да гэй, да не больна,
Палюбіла краснага малойца,
Да гэй, ненадоўга.
Здалі, здалі краснага малойца,
Да гэй, у салдаты,
Забылася я, маладая,
Да гэй, запытаці.
Забылася я, маладая,
Да гэй, запытаці:
— Ці пазволіш, красны малойчык,
Ты мне пагуляці?
- ↑ Кожны радок паўтараецца, акрамя апошняга.