ДАМІЦЭЛЯ
Каб яна, гэта ахмістрыня, бельмачамі за маім не сачыла, ён-жа б ніколі да яе ў прымы не пайшоў.
МАЦЕЙКА
Каб, ваша бродзіе, мой татка і яе (паказвае на КАЦЯРЫНКУ) татка гарэлкі ня пілі, дык і мамак ня пускалі-б у гандаль.
ВУРАДНІК
Ну, дык, павашаму, хто тут вінават?
УСЕ
Усе, ваша бродзіе!
МАЦЕЙКА
І манаполька!
ВУРАДНІК
Як я ўважаю, то гэтыя вашыя прымы падходзяць пад стацьцю, што судзіць за незаконную зьдзелку. Памірэцеся лепей, каб не дайшло дзела да суду!
КОЛЬКІ ГАЛАСОЎ
Яно-ж можна!
ВУРАДНІК
А каб мір мацнейшы быў, дык пацалуйцеся!
УСЕ
І гэта можна, ваша бродзіе! (Бабы цалуюцца між сабой, пасьля — мужы з жонкамі).
МАЦЕЙКА
Пазвольце, ваша бродзіе, і мне памірыцца з ёй! (Паказвае на КАЦЯРЫНКУ).
ВУРАДНІК
Што? і Ты ў прымы да яе прыставаў?
