Старонка:Творы. 1918―1928 (1930).pdf/85

АД МЕНСКІХ ДЗЯЦЕЙ

На прывітаньне IV Усебеларускага зьезду Саветаў

1

Ад дзіцячай згоднай, буйнай,
Зацьвітаючай Комуны
Чэсьць, прывет вам, дэлегаты
З беларускіх ніў і хатаў!

Гэй, работнікі, сяляне! —
Мазыране, Бабруйчане,
Ігуменцы і Случчане,
Ды Барысаўцы й Мянчане! —

Беларусы вы бяз плямаў,
Беларусы мы таксама, —
Хай на нашым на загоне
Век ніхто нас не разгоне.

Вы ужо сталы, мы — йшчэ малы,
А як вырасьцем, удала
Ўсе к вам пойдзем на падмогу
Церабіць к сьвятлу дарогу, —

За тым шчасьцем у дагонцы
Пойдзем, пойдзем аж да сонца.
Гэй, работнікі, сяляне,
Беларусі грамадзяне!