Старонка:Творы. 1918―1928 (1930).pdf/269

ПЕСЬНЯ АБ ПАХОДЗЕ ІГАРА

(„СЛОВО О ПЪЛКУ ИГОРОВѢ“)

Вершаваны переклад з орыгіналу

1

Ці ня добра было-бы нам, брацьці,
Старадаўнымі словы пачаці

Сказ аб Ігара трудным паходзе
Сьвятаславіча-князя прыгодзе?

А пачацца сягочасным ладам
Песьні тэй, — не Баянавым складам!

Бо Баян чарадзейны, як песьняй
Захацеў каму пеці пачэсьне,

Расьцякаўся вявёркай па дрэву,
Шэрым воўкам па полі пасеву,

Сівакрылым арлом пад аблокі, —
Так захопліваў сьвет ён далёкі!

Помніў ён бо, як кажуць, старыны
І разрухі ўсе даўных часінаў:

Выпушчаў дзесяць сокалаў радам
Ды на белае лебедзяў стада,

А якая з іх сокалу ўпала,
Тая першая песьню пяяла: