будзь лікаў, потым супольны найвялікшы дзельнік трэйцяга ліку і першага супольнага найвялікшага дзельніку, потым супольны найвялікшы дзельнік чацьвёртага ліку і другога супольнага найвялікшага дзельніку і г. д.; апошні дзельнік і будзе супольным найвялікшым дзельнікам усіх дадзеных лікаў.
Найменшы многаразавы лік.
137.Найменшым многаразавым лікам двох або некалькіх лікаў наз. самы меншы з усіх лікаў, каторы дзеліцца на дадзеныя лікі без астачы, напр.: 36 ёсьць найменшы многаразавы лікаў: 4, 6, 9, 12, 42 — найменшы многаразавы 6, 14, 21.
138.Каб знайсьці найменшы многаразавы некалькіх лікаў, трэба ўсе гэтыя лікі раскласьці на прапачаткавыя дзельнікі, потым выпісаць усе прапачаткавыя дзельнікі дадзеных раскладваньняў у іх вышэйшых ступенях і ўсе гэтыя дзельнікі перамножыць; дастанае множыва і будзе найменшым многаразавым дадзеных лікаў.
Няхай патрэбна знайсьці найменшы многаразавы лікаў: 36, 45, 54, 60, 72.
Раскладзем дадзеныя лікі на простыя дзельнікі.
| 36 — 2·2·3·3. |
| 45 — 3·3·5. |
| 54 — 2·3·3·3. |
| 60 — 2·2·3·5. |
| 72 — 2·2·2·3·3. |
Найменшы многаразавы іх =2·2·2·3·3·3·5=1080.
Пры шуканьні найменшага многаразавага раскладаньне дадзеных лікаў на прапачаткавыя дзельнікі спрошчываецца гэтак: пішуць дадзеныя лікі ўпоравень і з правага боку ад апошняга ліку працягваюць старчовую рысу; пры гэтым лікі, уваходзячыя сумножнікамі ў апошнія лікі прапускаюць, а дастаныя дзелі, якія ёсьць у адной з апошніх дзелей, закасоўваюць, лікі-ж, якія ня дзеляцца, перапісваюць бяз зьмены. Множыва ўсіх дастаных дзельнікаў і будзе найменшым многаразавым усіх дадзеных лікаў.
