Старонка:Агні (1930).pdf/11

∗
∗     ∗

Сябры мае каханыя,
Браты і дружбакі…
Я часта сьню нязнаныя
Далёкія шляхі.

Мы ўсе знаёмы з бурамі,
Ўзрасталі ў барацьбе
І часта трубадурамі
Ўзьвялічваем сябе…

Ах, песьні нашы звоністы,
Ў іх — радасьць і вясна, —
На новы лад разгоністы
Наведзена струна.

Ды песень шмат пастаўлена
На новыя лады
І ў песьнях тых услаўлены
Агнёвыя гады,

І ў песьнях тых узьнесена
На сонечны пасаг
Краіна шумаў песенных —
Жывых дарог прасьцяг.

З вятрамі-веснаходамі
Памкнемся мы ў абшар,
Каб новыя мэлёдыі
Прынесьці краю ў дар…

Змаганьню буйнавіраму,
Адвазе перамог —
Тады вітаньне шчырае
Мы ў песьнях аддамо.

5