Ale hetyja niaščasnyja pad kaniec žyćcia ciažka adčujuć, jakuju biazhłuzdaść dy marnatu jany lubili.
A śviatyja Božyja dy ŭsie pryjacieli Chrystusa nia imknucca da taho, što było ŭ spadobu ichniamu ciełu, abo da taho, što było słaŭnym u tuju paru na ziamli, ale ŭsieńkuju nadziejaj dy dumkaju latucieli ab viečnym dabry.
Serca ich biazupynna imknułasia da rečaŭ biazmiernych i niavidomych i ścierahłosia, kab luboŭ vidomych rečaŭ da ziamli ich nie ciahnuła.
5. Nie pakidaj, bracie, nadziei na postup u duchovym žyćci, — jašče maješ čas na heta.
čamu ty adnak adkładaješ na zaŭtra ździejśnieńnie svajej dumki? Ustavaj chutčej i zaraz pačynaj, kažučy: ciapier para pracy, ciapier para baraćby, ciapier chvilina papravicca.
Kali tabie drenna dy ciažka — voś heta i budzie para, kab mieć zasłuhu.
Bo-ž treba tabie prajści praz ahoń i vadu, pakul trapiš u miesca achałody (Ps. 65, 12).
Kali sam siabie nie pieramožaš, — nie zvajuješ svaich zahanaŭ.
Pakul žyviom u hetym słabym ciele, nia zdolejem stryvać biaz hrechu dy žyć biaz turbot i boli.
Chacieli-b my žyć u supakoju biaz nijakaj biady, dziakujučy adnak tamu, što zhubili my praz hrech niavinnaść — z jeju zhubili my i sapraŭdnaje ščaście.
I tamu treba być ciarplivym i čakać ad Boha miłasernaści, pakul minie niahodnaść hetaja (Ps. 66, 2), pakul žyćcio nie pahłynie śmierci (Kor. 5, 4).
6. O, jakaja-ž vialikaja niadužaść ludzkaja, što zaŭsiody skłonnaja da błahoha!
Siońnia spaviadaješsia z hrachoŭ svaich, a zaŭtra ŭznoŭ robiš toje, z čaho spaviadaŭsia.
Ciapier pastanaŭlaješ ścierahčysia błahoha, a za hadzinu hetak, jak byccam ničoha nie pastanaŭlaŭ.
Dyk sapraŭdy treba nam spakarycca i nikoli ničoha vialikaha nia dumać ab sabie, bo-ž takija my niadužyja dy niastałyja!
Chutka možna, dziakujučy niadbajłaści, zmarnavać toje, što było zroblena praz vialikuju pracu dy łasku Boskuju.
7. Što budzie z nami ŭ kancy žyćcia našaha, kali my tak rana styniem?
Drenna z nami, kali my chočam adpačynku, jak byccam užo byŭ supakoj i biaśpiečnaść, a tym časam niama ŭ nas ani śledu sapraŭdnaje śviataści.