Спадчына (1922)/VI/Душачка шынкарка

← Ня ўсе дома

Душачка шынкарка Верш Аўтар: Янка Купала 1922 год

Пры выпіўцы →

Іншыя публікацыі гэтага твора: Душачка, шынкарка…

Прапануем да спампаваньня!

ДУШАЧКА, ШЫНКАРКА…

Душачка, шынкарка,
Калі ў бога верыш,
Дай, дай пахмяліцца,
Хоць чарку, хоць трошкі!

Кепска трохі: грошы
Ня маю сягоньня,
Але-ж мяне знаеш,—
Я круціць ня ўмею.

Ўрэшце і заставу
Дам, калі захочаш
Гэтага замала,—
Шчыра пацалую.

Эх, каб яго немач
З гэтакім і шчасьцем!
Ты і ў цям ня возьмеш,
Што спаткаці можа.

Так учора цьвёрда
Меціўся ня ўпіцца,—
Бач, сваяк наўрэўся,
І глядзі, што вышла:

З сваяком пабіўся,
Чуць дамоў заплёўся,
Ўхлёпаўся ў балота
І пасеяў шапку.

А пасьля пахмельля
Смак ці знаеш гэты?—
І ў грудзёх трасецца,
І лоб як ня трэсьне.

Дык, шынкарка-сэрца,
Калі ў бога верыш,
Дай, дай пахмяліцца,
Хоць чарку, хоць капку!