Песьня (Купала — Каб была я перапёлкай…)

З пляцоўкі Вікікрыніцы
Jump to navigation Jump to search
Песьня
(З народнай)

Верш
Аўтар: Янка Купала
1913
Крыніца: http://rv-blr.com/literature/2673#29453


Каб была я перапёлкай,
        Каб я волю мела, —
Дзе б хацела, паляцела,
        Дома б не сядзела.

Ці па ягады ў бор шчыры,
        Туды, за сялібкі,
Ці ў лес цёмны па арэхі,
        Дзе ляшчэўнік гібкі.

Ці ў зялёны луг, дзе рэчка
        Ўецца і лялее,
Па каліну па чырвону,
        Што ў тым лузе сьпее.

Ой, ня быць мне перапёлкай,
        Крылейкаў ня меці,
Ні ў бор шчыры, ні ў лес цёмны
        Мне не даляцеці!

Найгарчэйшыя у лузе
        Ягады каліны,
Найцяжэйшая на службе
        Доля у дзяўчыны.

Як я выйду, маладзенька,
        За вароты ў поле,
Паліюцца самі сьлёзы
        Зь цяжанькай нядолі.

Ой, крывава паліюцца
        Мае горкі сьлёзы,
Бы расіца ў летню ночку
        Зь беленькай бярозы.

Плачуць вочы век да веку
        Дома і на полі —
Не па добрым чалавеку,
        А па добрай волі.

(1913)