Песьня (Гарун — Прыказала слонца ветру…)

З пляцоўкі Вікікрыніцы
Jump to navigation Jump to search
Песьня
Верш
Аўтар: Алесь Гарун
Крыніца: http://rv-blr.com/literature/4913#72323


Прыказала слонца ветру
         Перастаці,
Прамаўляла: «Годзе, ветрэ,
         Бусаваці».
Прамаўляла: «Дай жывёлам
         Адпачынку,
Перастань жа, ветрэ, дзьмуці
         Безупынку».
І ўзышло ў бліскучай шаце
         Залатое
І пястуець любым вокам
         Ўсё жывое.
Не сядзіцца ветру ў хаце —
         Быстраходу,
Не уцерпеў, ўзьняўся бурай
         Ад заходу.
Карагоды хмар па небе
         Панясьліся,
Паліліся зь неба сьлёзы,
         Паліліся…

Прамаўляла дзеўча сэрцу —
         Ненаглядзе:
«Не хадзі ты вішні есьці
         Ў чужым садзе.
Не хадзі к другой ў залёты,
         Не ўдавайся,
У другія вочкі, любы,
         Не ўглядайся».

Лугавой лілеяй дзеўча
         Расквітала,
Цалавала сваю ўцеху —
         Мілавала.
А няверны той удаўся
         За другою, —
З млынароўнай пахаджае
         Над ракою.
З млынароўнай жарты строіць
         Каля млына,
А дзяўчына сохне, вяне,
         Як галіна…

Ой, з-за хмарак ясна слонца
         Йшчэ узыйдзе,
Да дзяўчыны ж любы ўвечар
         Больш ня прыйдзе.