Панскае ігрышча

З пляцоўкі Вікікрыніцы
Jump to navigation Jump to search
Панскае ігрышча
Верш
Аўтар: невядомы


Каб ты ведаў, брат кумішча,
Што учора відзеў я?
У паноў было ігрышча,
Ды якое, ай, ай, а!

Вот ігрышча, дык ігрышча,
Не такое, як у нас:
У цымбалы б’ець жыдзішча,
Як калом, дык вот якраз.

Два жыдкі у скрыпкі валяць,
Трэці парх у дудку дмець.
А у мейсцы як засмаляць,—
Аж цябе тут затрасець!

Была яшчэ і скрыпішча
У абхват будзе якраз,
У ёй бас, дык вот басішча!
Як аборына у нас.

Музыканты як прыўдараць
Усе разам казака,
Дык у вочах цёмна станіць,
Аж забудзіш языка!

Б’ецца сэрца, як цапамі,
Дрыжаць ногі пад табой,
І у танец ідуць самі —
Проста самі меж сабой.

А паноў? дык як на сходзе,
Калі член прыедзе сам.
Ўсе прыбраўшыся па модзе,
Але ж як? і куды ж нам!

Панічы усе прыбраны,
Усе ў куртках як адзін:
Рукавічкі маляваны,
Боты вострыя, як клін.

Акуляры ж кожны ж носе,
Вісяць тут пад барадой.
Іншы ушчаміў на носе,
Танцуючы з маладой.

А кашулі — ляксаваны,
Але ж белыя, як снег!
Зарукаўкі пазвіваны
І з гузамі, як гарэх!

А паненкі ж? твар як трэба,
Але ж вопраткі, хвігуры?..
Ну не ядуць, мусіць, хлеба
Адны толькі канфітуры!

Ні якога няма складу:
Жыватоў у іх нямаш,
Але стырчыць штосьці з заду
Толькі ездзіць на кірмаш.

Ні то конская кульбака,
Ні то кашэль, ні жаўлак,
Ці пузыр з-пад андарака…
Ну не ведама ніяк.

Адзін паніч нетутэйшы,
Мусіць, з места ён, ці што,
А усіх быў найстрайнейшы
І прыгож сабе нішто.

Закрычыць, каб мусіць вальца
Ці якое жыд стаў граць,
А жыд стары міргельць мальцу,
А той давай ўсім міргаць.

Глядзі, струны нацягаюць,
Іншы ў дудку зачне дуць,
Тагды разам як зайграюць,
Як заваляць, як дадуць.

Калі панічы ускочаць,
Пагавораць меж сабой,
Да паненак штось балбочаць.
І пайшлі так, як на бой!

Тыц усталі і паненкі,
Кожны бярэ, яку хоча,
І, абняўшы за сукенкі,
Сярод хаты павалоча…

І давай па двох круціцца,
Як мяцеліцу у нас,
Аж у вачах мігаціцца,
Як дрыпочаць іншы раз.

После, пане, як заселі
За сталом чыста ўсе,
Дык пілі, пілі, а елі!
Дык няхай іх пранясе!

Вот каб гэтак мы гулялі,
І так пілі, і так елі, —
Я бы цёнгле быў на балі
Ад нядзелі да нядзелі!