Мікіта і валы

З пляцоўкі Вікікрыніцы
Jump to navigation Jump to search
Мікіта і валы
(Байка)

верш
Аўтар: Янка Купала
1910
Крыніца: http://rv-blr.com/vershu/view/46553



Ці летась, ці залетась, тут ці там —
      Штось мне няўцям,
      Ляшыў Мікіта
      Жыта,
      І, як на злосьць, яму адну
      Валы скрывілі баразну.
Вось ён і стаў (хоць добра йшлі ўсё лета)
      Ім выгаварываці гэта:
      «Я вас, — так кажа, — як магу
      І сьцерагу,
      Сам недасплю,
      А вас кармлю:
      Трасяначкай зімою,
Улетку траўкай лугавою,
      Штодня вадзіцы
      Даю з крыніцы.
А вы што мне? — Бязбожна
      Крыўляеце барозны,
      Хоць і няможна
      Ўсё такое»…
Валы пад тое:
      «Мы б мо і не крыўлялі,
Каб павадоў, ярма і пуг ня зналі».

(1910)