Маладняк (часопіс)/1929/7/Агнямі і кроўю сардэчных поэм…

⁂ (Агнямі і кроўю сардэчных поэм…)
Верш
Аўтар: Змітрок Астапенка
Ліпень 1929 году

Прапануем да спампаваньня!

З. АСТАПЕНКА

∗
∗ ∗

Агнямі і кроўю сардэчных поэм
Ваганьнем артэрый няспынным
Мы славу, вялікую славу пяем,
Табе, дарагая краіна!

Хай кожнае слова і кожны уздых
Зьвініць галасамі баянаў
У далях балотаў і багнаў сівых,
У проймах бялёсых туманаў!

Няхай у блакітныя высі твае
У час парпуровае рані
Бунтоўная праца штандар узьвіе
Чырвоны штандар будаваньня!

На сінім балоце, дзе багна і мох,
Дзе бросьня і водар багунны,
Няхай пракладзецца у будучнасьць мост
Пад рэйкамі гулкай чыгункі.

Няхай праімчыцца гарачы цягнік,
З эпохі крыві і нягоды.
І рушыць з сабою уздымныя дні
Вялікіх гадоў і стагодзьдзяў.

Агнямі і кроўю чырвоных поэм,
Сталёвай хадой індустрыі
Мы славу, вялікую славу пяем
Табе, дарагая краіна!