Ліст Язафата Кунцэвіча да Язэпа Руцкага ад 10.08.1622

З пляцоўкі Вікікрыніцы
Ліст Язафата Кунцэвіча да Язэпа Руцкага ад 10.08.1622
Верш
Аўтар: Язафат Кунцэвіч
Крыніца: крыніца

Спампаваць тэкст у фармаце EPUB Спампаваць тэкст у фармаце RTF Спампаваць тэкст у фармаце PDF Прапануем да спампаваньня!




Преосвященный отче пастыру нашъ!

Ожедаю на отписъ в. милости моего милостиваго Пана з Вилна и тымъ часомъ зъежчу водою до Витебска для умоцненя небожъя поповъ, которие велце суть утропени отъ поповъ апостатовъ и людей светскихъ в правде и большие ми не радили. Такъ, Богу взявши на помощъ, пустилемся. Побывавши тамъ и осмотревши, мышле выбратися, наконецъ, самъ до Варшавы хотли то з великою тяжкостью прийдетъ. Тымъ часомъ рачитъ в.м[ил]ость мой панъ тамъ бодрствовати, и тымъ забегати которые Х. Бога и святыхъ его могутъ намъ допомочи для Х. Бога, жебы его милость Х. лекгость серца нетратилъ и вратунку неуставалъ, до которого пишу при отдаванью листу рачъ тежъ в.мость мой милостивый Панъ ему всю справу тутешнюю преложити ведле первого описанья моего до в.милости, кгды потвержоный будетъ декретъ комисарскии лацно ся тутъ успокоитъ, бо ещеся не взмогли осьмъ хлоповъ, або десять тилько то броятъ, шляхты немашъ жадное. Ездили або ходили до некоторыхъ герштиковъ шлахты полоцкое листъ справивши до короля его милости и упросили ихъ, жеся подписали попившися, чого напотомъ жаловали и сами неведали, до чого ся подписовали, яко потомъ сами вызнали. Екзекуторми того декрету нехайбы тыхъ же комисаровъ назначилъ король его милость, его милость пана Ковщеру кгвалтем повезли, тыхъ бестый косматыхъ соболевъ, рысевъ, вепровъ уже тежъ его полочане и могилевцы, ажъ на збытъ уславили тыми подарками по всемъ краю рускомъ, бо што дадутъ або маютъ дати вчомъ кажутъ, в чомъ рачъ его вашмость, милостивый мой панъ, перестеречь и въ его надею все собе смети починаютъ. Теперь уховай, Боже, еслиже такое поблаженье отнесутъ або тотъ декретъ тамъ без скутку яко и могилевский зостане невымовне всехъ духовныхъ и светскихъ тое хлопство утрапитъ... не мало до пекла пойдетъ.

Да его милость панъ канцлеръ ажъ теперь... на листъ его ми-лости презъ бунтовниковъ полоцкихъ мне отданый усправедли..., же мя не слушне удали о грубиянство поповское не зважаючи, же схизма грубиянства намножила, а не едность еще и то недобре же его милость листы мне за ними даючи, копее тыхъ же листовъ сняли писири имъ зброднемъ даютъ, которые они всюды по своихъ розсылаютъ, часомъ тежъ сами снявь, отпечатавши, преписуютъ, потомъ притиснувши яко-кольвекъ печать отдаютъ. Если к воли козакомъ чинятъ и на томъ сейме Св.Бога и правду его святую кафолицкую опримуютъ , тымъ ближшее тое панство (чого, Боже, уховай) до згубы бо презшло, хто грешитъ, презъ того можетъ быти скаранымъ. Познавши то, Козаки же на ихъ респектуютъ , а чогося неважатъ, што все опатрности Божіей належитъ полецати на авдиенции у короля его милости рачъ. Вашмость, милостивый мой панъ, мою справу пильно залецить, жебы могла мець скутокъ звлащаже инстанция наступитъ его мость пана воеводы, который ленцвойта своего высылаетъ знову до двору также и ураду мейсткого, кото-рый тежъ к воли самой той справе шлетъ двухъ всехъ тыхъ з справами ихъ милости. Помочи в.мости залецаю. О виленской колотне лотровской пилно рачъ в.милость королю его милости преложити все бунты и непокое схизматицкие от тамтыхъ походятъ.

Отдаюся притомъ въ звыклую вашу милость моего милостиваго пана.

С Полоцка в пятомъ предъ внебовзятіемъ пречистое святримского свята.

Вашей милости моего милостиваго пана рабъ Іоасафъ