Зь песень нядолі (Купала — Шумныя бярозы…)

З пляцоўкі Вікікрыніцы
Jump to navigation Jump to search
Зь песень нядолі
Верш
Аўтар: Янка Купала
Крыніца: http://rv-blr.com/vershu/view/662



Шумныя бярозы
      Пабяліў мароз.
Хацеў бы я плакаць,
      Дый ня маю сьлёз.

Хацеў бы я пеці
      Аб сваёй бядзе,
Дый мне сэрца ные,
      Песенька ня йдзе.

Хацеў бы, каб зімаў
      Строгіх не было,
Каб зарэла цягам
      Летняе цяпло.

Хацеў бы, каб доля
      У хатцы жыла,
Каб з бурлівай рэчкай
      Нядоля сплыла.

Хацеў бы, каб воля
      Гуляла са мной,
Каб сонейка грэла,
      Як грэе вясной.

Але, Божа мілы!
      Долі не відаць, –
Кайданы няволі
      На руках зьвіняць.

Няма вясны, сонца,
      Сьветлых дзён няма, –
Марозам марозіць
      Строгая зіма;

Марозам марозінь,
      Сьнегам адзяе,
На работу гоніць,
      Есьці не дае.

Эх, пайду я ў поле
      Долечкі шукаць
З востраю касою,
      Як на сенажаць.

Ой, пайду я ў поле,
      Як бы на вайну,
Шукаючы волю,
      Шаблячкай махну!

Ой, пайду я ў цэркаў,
      Сьвечачку куплю, –
Можа, згіне гора,
      Якое цярплю.

Можа, ўзойдзе доля
      Ясьненькай зарой,
Можа, блісьне сонцам
      Воля нада мной!

(1905–1907)