Збор твораў (Колас, 1928—1929)/I/2/V/Ноч у вастрозе

Ноч у вастрозе
Верш
Аўтар: Якуб Колас
1928 год

Іншыя публікацыі гэтага твора: Ноч у астрозе.

Прапануем да спампаваньня!

НОЧ У ВАСТРОЗЕ

Ноч глухая. Ціха.
Густа легла цьма.
Дрэмле чутка варта,
Цяжка сьпіць турма.

Страшнай зяўрай зьмея
Карыдор глядзіць,
І тужліва лямпа
Сьвеціцца, дрыжыць.

Обак карыдору
Камэры відны.
Пад замкамі дзьверы,
З кратамі яны.

І, здаецца, сьцены
Ціснуцца цяжэй,
Гнуць яны і душаць
Ўсё мацней, мацней,

Нудна, бы ў магіле.
Глуха, бы ў труне,
Толькі часам крыкне
Арыштант у сьне.

Мо‘ Кабека^[1] здасца,
Спраўніка прысьніць,
Ды „параша“ зрэдка
Глуха загрыміць.

1908 г.