Дух часу (Вальтар)

Дух часу Верш Аўтар: Віктар Вальтар 1927 год Крыніца: Родныя гоні. — Ліпень—Жнівень 1927. — Кніжка 5. — С. 4

Прапануем да спампаваньня!

В. ВАЛЬТЭР

Дух часу

Нехта няведамы ходзе,
Вось не злавіць, не забіць.
Думкі аб новай свабодзе
Стаў ён людзём гаварыць.

Што яму войска, што межы,
Што гэты варты прад ім?
Ен-жа як дым без адзежы,
Ен-жа хутчэйшы за дым…

Зьляцца^[1] на варце, як зьверы,^[2]
Мсьцяць ўсё людзём, — не яму,
І праз зялезныя дзьверы
Гоняць нявінных ў турму.

Дух-жа ўсё ходзе ды ходзе!
Не, — яго ў век не злавіць…
Нехта аб новай свабодзе
Ў вёсках пачаў гаварыць…

Дзьвінск, 1927 г.

---

1. рус., паблр. — злуюцца.
2. рус., паблр. — зьвяры.