Другое чытанне для дзяцей беларусаў (1909)/Ў мяцеліцу

← Мяцеліца

Ў мяцеліцу Верш Аўтар: Якуб Колас 1909 год

Зімні вечэр →

Прапануем да спампаваньня!

Ў мяцеліцу.

Ох, густые былі хмары!
І валіў жэ белы сьнег!
Ну, канец, я думаў, будзе:
Бог скараў мяне за грэх.
А укруг лежало поле…
Цемень, ноч… Загінуў сьлед.
Бура песьні так сьпевала, —
Думаў я, сканчоны сьвет.
Нікнуў дух і сэрцэ ныла.
Страх мяне апанаваў;
Думаў я, што вецер ў полі
Мне магілу гатаваў.
Але бліснуў месяц ясны,
Мне дарогу асьвяціў,
А сабачы брэх далёкі
Праважатым маім быў.

---