Доля (Сыракомля/Купала)

З пляцоўкі Вікікрыніцы
Jump to navigation Jump to search
Доля
Верш
Аўтар: Уладзіслаў Сыракомля
1854
Пераклад: Янка Купала
Крыніца: Сыракомля, Уладзіслаў. Выбраныя творы [вершы, гутаркі, проза] / Уладзіслаў Сыракомля. — Мінск : Кнігазбор, 2006. — 526 с., 1 л. партр.


Ные сэрца без патолі,
Нудна льюцца слёзы…
Выйду клікаць лепшай долі
Ў даль, пад шум бярозаў.

Дзе ты лепшая, дзе, доля?
Прыбудзь — хай пазнаем!
Прымем хлебам, прымем соляй,
Шчыра прывітаем.

Дарма плачу, заклікаю
І ў жалі малю я:
Вецер словы адбівае —
Доля ані чуе…

Ой ты, песенька, маўчы ты!
Не нам вецер збіці:
Хадзі з сэрцайкам разбітым
Па долі тужыці.