Гімн беларускіх паўстанцаў

З пляцоўкі Вікікрыніцы
Гімн беларускіх паўстанцаў
Гімн
Аўтар: Уладзімір Жылка
Крыніца: http://litby.com/stihi/zhylka/237-zhylka-008.html

Спампаваць тэкст у фармаце EPUB Спампаваць тэкст у фармаце RTF Спампаваць тэкст у фармаце PDF Прапануем да спампаваньня!




Час, Беларусы, ўжо час -
Маці-Краіна нас кліча.
Устанема дружна, ураз -
Сіл нашых вораг не зліча.

Рушыма ў бой
Усёй грамадой -
За люд працоўны,
За волю і роўнасць!

Грозны надходзіць мамэнт,
Бой пачынаем рашучы:
Скрышым старое ушчэнт,
К волі змагарна ідучы.

Рушыма ў бой
Усёй грамадой -
За люд працоўны,
За волю і роўнасць!

У песнях бязудзерж таім;
Вецер штандарамі вее.
Прысягу складаема ім
Родных не здрадзіць надзеі.

Рушыма ў бой
Усёй грамадой -
За люд працоўны,
За волю і роўнасць!

Бурны нас радуе дзень,
Кліч агалошвае полі,
Сонца вітайце прамень
Праўды мужыцкай і волі.

Рушыма ў бой
Усёй грамадой -
За люд працоўны,
За волю і роўнасць!

Дружная моц - грамада
І перамозе зарука,
Больш нас не чэпіць бяда,
Годзе напасцяў, прынукаў!

Рушыма ў бой
Усёй грамадой -
За люд працоўны,
За волю і роўнасць!

Край абаронім грудзьмі
Ад панавання палацаў.
Вольнай, працоўнай сям'і
Ўспор красаваціме праца!

Рушыма ў бой
Усёй грамадой -
За люд працоўны,
За волю і роўнасць!

(?)