Выбраныя вершы (Чарот, 1925)/Чырвоныя вясьнянкі/Чырвоныя вясьнянкі/Зазьвінелі рэчкі крыгамі…

← Чырвоныя вясьнянкі

1. Зазьвінелі рэчкі крыгамі… Верш Аўтар: Міхась Чарот 1925 год

2. Паглядзі, на полі вораным… →

Прапануем да спампаваньня!

ЧЫРВОНЫЯ ВЯСЬНЯНКІ

1.

Зазьвінелі рэчкі крыгамі;
Сонца чэрпае променем лужы.
Калёсамі вуліца скрыгае…
Жураўлі па-над вёскаю кружаць.

Прывіталі высь блакітную
Сьпевы жаўрыка у белым тумане.
Балота пушыцца ракітаю;
Лес шуміць, спатыкаючы раньне.

Сенажаць прайсьці прыгожа нам, —
Паміж зелені выплылі кветкі…
Каровамі выган стрыножаны,
Рвуць рагамі куп‘ё пералеткі.

Зашумела поле хвалямі,
Мітусеньнем выплыўшай руні…
Вясну закліканьнем хвалім мы.
Не змаўкаюць гучлівыя струны.