Восень (Колас — Пуста ў лузе. Толькі стогі…)

З пляцоўкі Вікікрыніцы
Jump to navigation Jump to search
Восень
Верш
Аўтар: Якуб Колас
Крыніца: http://rv-blr.com/pages/book_contents.jsp?idLit=3023#90


Пуста ў лузе. Толькі стогі
Парыжэўшыя стаяць
Ды шпакі каля дарогі
Цэлы дзень адно крычаць.

Грэчка зжата. Гола ў полі.
Жыта зьвезена даўно.
Толькі плаваюць на волі
Кучы хмар, як валакно.

Дожджык сее беспрастанку;
Вецер сьвішча так, як зьвер…
Колькі лужын каля ганку!
А гразі, гразі цяпер!..

Ссохлі травы, ўсё павяла.
Слоць, плюхота, холад, цьма.
Эх, скарэй бы закрывала
Зямлю чорную зіма!