Водгульле (1922)/Ворагам

← Поле

Ворагам Верш Аўтар: Якуб Колас 1922 год

Люд стогне →

Іншыя публікацыі гэтага твора: Ворагам (За што лілася кроў людзкая?..).

Прапануем да спампаваньня!

ВОРАГАМ.

За што лілася кроў людзкая?
За што гібеў і гінуў люд?
Гібеў набытак ўсяго краю,
І пакаленьняў гінуў труд?

І бег народ, як ў час паморку,
Закрыўшы вочы, ў Божы сьвет,
І толькі дым ўздымаўся горкі,
І крыж адзначываў іх сьлед.

А колькі сьмертак дзетак мілых
На вашай совесьці ляжыць?
Пануе ціш на іх магілах,
І край разбураны маўчыць.

І вы цяпер рукамі ката
Гатовы згоду „дараваць“,
Але ці можна у вас брата,
Скажэце, Каіны, прызнаць?

Вам не па сіле груз цяжэрны
Вайны, што самі вы ўзьнялі;
Яе пажар і мах бязьмерны,
Згінота цяжкая зямлі!

Ня вы дасьцё народам сьвята,
Ня вам пажар вайны заліць.
Прэч вашы рукі, збойцы, каты —
Ня вам аб згодзе гаварыць!

2/XII 1916 г.