Байкі (Друцкі-Падбярэскі, 1926)/Выбарнае начальства

← Млынар і куры

Выбарнае начальства Байка Аўтар: Іван Крылоў 1926 год Арыгінальная назва: ru:Мирская сходка (Крылов) Пераклад: Баляслаў Друцкі-Падбярэскі

Асёл →

Іншыя публікацыі гэтага твора: «Выбарнае» начальства (Крылоў/Друцкі-Падбярэскі).

Прапануем да спампаваньня!

„Выбарнае“ начальства.

Воўк неяк за пратэкцыяй лісіцы,
Якая сябравала з самай львіцай,
Прасіў ў Льва — Цара
Яго назначыць старастай авечага двара.
Аднак, дзеля таго, што кандыдат
Не надта добрай славай карыстаўся,

Леў выдаў свой загад,
Каб сход скаціны усей забраўся.
Бо ўжо і між зьвяроў
Пануе нашых дух часоў:
Рашае большасьць галасоў.
Дык вось, на сходзе й леў
Даведацца аб тым хацеў,
Якую большасьць воўк:
Ці за сябе, ці проці меў.
І вось — забраўся сход,
Спрачаецца, шуміць народ,
(Вядома, як на кожным сходзе).
Аба усім ідзе тут мова,
Аднак проці ваўка ні слова
Ніхто не выказаў ў народзе.
Авечкі тут-жа згрудзіўшысь стаялі,
Уздыхалі ды… маўчалі.
Зусім тады ня дзіва,
Што леў, ня чуючы ніякага спраціву,
Такі свой выдаў прыгавор:
Аддаць ваўку авечы двор!

---

Такі вось вынік сходу
Залішне часта ў нас бывае:
Што воўк дый „голасам народа“
Аўцам у начальства пападае…