Гэта старонка была вычытаная
17. ЖУРАВЫ ЛЯТУЦЬ
Журавы лятуць,
Палудзень нясуць —
Будзем мы палуднаваць.
Журавы селі,
Палудзень з’елі
Нечага палуднаваць.
Мамачка ідзе,
Палудзень нясе —
Будзем мы палуднаваць.
18. А НА ГАРЭ ДЗЕЎКА ПШОНКУ ЖНЕ
А на гарэ дзеўка пшонку жне.
— Сцеражыся, дзеўка, тучка йдзе.
— А я гэтай тучкі не баюся:
Гэта тучка — свякроў мая,
А дробны дожджык — дзевер мой,
А буйны вецер — свёкар мой.
19. А З ЛУГУ, З ЛУГУ ДОЖДЖ ІДЗЕЦЬ
А з лугу, з лугу дождж ідзець[1],
З-пад цёмнай хмаркі пярун б’ець.
— Ці не баішся, Васілька?
— Каго я буду баяцца?
Гэта не пярун, а татка мой,
Ды ён жа мяне не заб’ець.
Ды ён жа мяне не заб’ець,
Ды й шчасцем-доляй абашлець.
- ↑ Кожны радок паўтараецца.